O técnico do Celta Fortuna pensa que o seu equipo foi moi superior na primera metade en Espiñedo e pagou non ser quen de marcar o segundo gol
21 may 2024 . Actualizado a las 10:24 h.O adestrador do Celta Fortuna, Fredi Álvarez, considerou que o seu equipo foi «moi superior» ao Arenteiro na primeira parte do partido desde sábado en Espiñedo, se ben os partidos «duran 90 minutos» e se tivo que conformar cun punto que non lle parece xusto. «Non me serve iso dunha metade para cada equipo, porque se na primeira o resultado fose 0-3, seguramente a segunda non sería a mesma», argumenta.
O técnico moañés cre que lles pasou factura non ser capaces de materializar nun segundo gol a superioridade dos primeiros 45 minutos. «Sabiamos que o rival ía empurrar, meternos na área con moito centro e así foi, acadaron o empate cunha falta lateral e temos que marchar cun punto para casa», asumía. Pensa que iniciaron mellor ca o Arenteiro a segunda metade, pero foi desde o minuto 15 cando cambiou o panorama. «Igualaron o sistema e estiveron mellor, foron máis profundos, con moitas superioridades na banda dereita con Pibe e Jordan e nos xeraron problemas», dicía.
Quixo comezar a comparecencia falando sobre a clasificación matemática para o play-off, xa que se produciu por outros resultados logo de gañar o seu partido anterior. «Non tiven a oportunidade e quería agradecer ao Celta que me dese esta oportunidade de adestrar a este equipo. Metémonos en play-off e foi unha celebración rara, non o fixemos no campo. Quería agradecer ao club e ao anterior corpo técnico, que foi clave para o desenvolvemento deste final de tempada», observa.
Ademais, foi preguntado polo play-off do equipo que el dirixía ata hai un par de meses, o Celta C Gran Peña, que disputa o play-ff coa Sarriana. «Nun club coma o Celta sempre estamos pendentes de todo o que sucede nas diferentes categorías. É un equipo co que traballamos moitísimo con eses xogadores e tamén estivemos pendentes dese 0-0. Oxalá na volta sexan quen de pasar a eliminatoria», concluía.